"وليد واقف وبيمسك خده مكان ايد سعاد والقلم اللى ضربتهوله"
"سعاد بتدارى عينيها من وليد مش متخيله انها مدت ايديها عليه فعلا "
"وليد بيبصلها مصدوم"
"نوال بتجرى على صوت قفل باب على"
"فى ايه يا ماما فى ايه يا وليد"
"وليد بيبعد عنها" مافيش حاجه
"وليد واقف بيخبط على باب على ..افتح يا على "
"مافيش رد"
"سعاد بتجرى على الباب" افتح يا على
"على من جوه الاوضه" سبونى فى حالى
"سعاد" اخرج يا على بدل ما اروحلها انا واحرجهم
"وليد بيبص شذرا لمامته اللى كلامها مبيهداش فى حدته بل بيزيد"
"سعاد بنفس القوه" افتح يا على احسنلك والله انت حر
"بيفتح على الباب وفى ايده شنطه سفر "
"سعاد بتبص على الشنطه اللى فى ايده " يلا بالسلامه بس بردوا هتسيبها انا هروحلهم وافك الشبكه معاهم
"على بعصبيه" حرام عليك انتى بتعملى كده ليه انا عمرى ما هتجوز غير منال ان كنت مبتعصبش او بزعلك دا علشان انا بخاف ربنا فيكى متجيش عليه اوى كده ومتفتكريش ان دا ضعف منى دا خوفى من عقاب ربنا "
"وليد واقف حزين عارف اد ايه على طيب وحنين وممكن يجى على نفسه علشان يرضى الكل"
"سعاد بنفس الصلابه" خلاص يبقى اخر كلام.. والله العظيم يا ولاد قلبى لو واحد فيكم ما وافقش على جميله ورضى يتجوزها وبرضا لا تبقوا ولادى ولا اعرفكوا وقلبى هيغضب عليكم ليوم الدين وبردوا لا انت هتتجوز منال ولا اخوك هيتجوز اللى على مزاجه ويا انا يا انتوا "
"على" حرام عليكى انتى بتعملى فينا كده ليه ؟؟
"وبحزن انا مخلفتش ربنا يسامحكوا ...عاوزين تخسرونى اهلى طول العمر مالها جميله بنت متربيه لو فلاحه هتقعد معانا وهتتغير انا كنت جايه ازاى يعنى وربيتكوا اهو واتغيرت معاكو فكروا وردوا عليا انا مستنيا اخر رد وبتتجه بأتجاه اوضتها
"وليد بيبص لعلى "
"على بيبعد بعينه بأنكسار"
"وليد برد حازم وهو بيخطى خطاه بأتجاه اوضته" خلاص انا هتجوزها
"سعاد رجليها بتثبت مكانها وعلى وشها اترسمت ابتسامه وبتتلفت" انت يا وليد
"وليد " كده ارتاحتى يا ماما
"على بنظرة حزن" انا اسف يا وليد
"وليد بأبتسامه" انت مجنون بتتأسف ليه هى جوازه ولا اكتر ويلا اهى هتبقى جوازه من غير تعب
"على حاسس ان وليد بيدارى وجعه بأبتسامته وعارف انه ضحى علشان خاطره هو ومنال"
"سعاد بترجع وبتحضن فى وليد" والله يا وليد لاجبلك احلى عفش وشطبلك شقتك اجمل تشطيب هتشوف انا هعملك ايه .. ربنا يخليك ليا مكسفتنيش اوقدام اهلى
"وليد بكسره" خلاص يا ماما
"على بيسبهم وبيدخل اوضته وبتدخل وراه نوال بشنطة على وهى مبسوطه انه مش هيمشى هو كمان خلاص"
...........................................................................................
"وليد قعد على سريره وهو مكبل بالاحزان ..ياترى اللى عملته صح ولا غلط ..يعنى كنت اسيب على يسيب منال وانا عارف اد ايه حبه ليها وهى كمان اد ايه بتحبه..وانا ذنبى ايه اتجوز واحده مبحبهاش ..وبيفتكر رشا ..ياترى هعمل ايه معاكى وثقتك فيا انا كده بضيع اى امل عيشتيه معايا وبضيع ثقتك فى الناس يارب انت العالم باللى انا فيه "
"بيتصل من التليفون اللى على سريره " الو اذيك يا رشا
"اذيك انت يا وليد كان قلبى حاسس انك هتتصل بيا فضلت واخده التليفون جمبى طول اليوم "
"وليد بحزن" انتى عامله ايه
"كويسه وحشتنى اوى يا وليد ...10 ايام متسألش عليه خالص كده "
"معلش يا رشا غصب عنى "
"مالك صوتك زعلان ليه كده"
"انا مكلمك علشان انا صريح معاكى ومحبش اضحك عليكى والف وادور"
"قلقتنى يا وليد"
"انا هحكيلك الظروف اللى اتحطيت فيها وانتى تقوليلى انا اتصرفت صح ولا غلط"
"سمعاك"
...................................................................
"وائل بيوصل مراة الشيخ اللى بيشتغل عنده "
"الزوجه كل شويه تكح "
"وائل مستغرب كحتها مش تعب اد ما هيا لفت انتباه"
"بصوت رقيق هامس" انت
"وائل بيبصلها من المرايه" نعم حضرتك
"بصوت ناعم " انت اسمك ايه وشكلك مش من هون انت من وين يا اخى
"انا من مصر حضرتك"
"ما اجمل شباب مصر شكلك اصغير انت كام سنه"
"انا 18 وداخل ان شاء الله فى ال 19 سنه "
"اكتير صغير يلا الله يوفقك لو عاوز اى شئ ابقى قولى "
"شكرا"
"طيب اقف هنا "
"بيركن وائل اوقدام فيلا فى مكان هادى ومهجور نوعا مافيش غير الفيلا دى وفيلا تانيه اقدامها"
"احم احم ايه مش راح تفتحلى الباب"
"اه انا اسف وبينزل يفتحلها "
"بتنزل من العربيه وتتحط ايديها على ايده وهى نازله "
"وائل جسمه اتنفض وشد ايده بسرعه"
"هاهاهاها انت بتكسف ايه دا وشك احر اكتير"
"وائل مش عارف يرد"
"بطلع من شنطتها 200 دينار خد يا وائل بس اوعى تقول للشيخ انك جبتنى هنا اصل دا بيت واحده صاحبتى وهو مبيحبهاش ماشى "
"حاضر"
"ساعه كده لفلف بالسياره وبعدين تعالى خدنى"
"حاضر"
"وائل راكب العربيه وسايق وتفكيره مشتت" الست دى شكلها مش مظبوط ..ياترى هى عند صاحبتها فعلا"
........................................................................................
"رشا بدموع على خدها وصوت واطى ..قاعده على سريرها وقافله عليها اوضتها"
"متزعلش يا وليد دا نصيبنا منكونش لبعض وبعدين انت بتعمل اللى عليك على ومنال حرام يتفرقوا ومامتك حرام تخسر اهلها "
"يعنى انتى مش زعلانه منى وفاكره ان لعبت بيكى؟"
"بالعكس انت كبرت اوى فى نظرى يا وليد ومهما اتفرقنا انت هتفضل غالى اوى عندى "
"انتى بتصعبيها عليه اوى يا رشا ياريتك قولتيلى انا بكرهك "
"ليه يا وليد انت متستحقش بعد ما طلعت انسان جميل اوى ونبيل كده اكرهك وبعدين اللى يراضى مامته ربنا هيراضيه "
"رشا انا بجد حبيتك"
"وانا كمان وهنفترق بردوا بنحب بعض وبنحترم بعض يمكن كنا اتجوزنا واختلفنا واكيد ربنا مش بيعملنا حاجه وحشه ابدا"
"رشا انا متأكد ان هعيش عمره كله احلم انا كنت هعيش معاكى ازاى وربنا يسعدك مع انسان يقدر يقدرك ولو ان انا واثق اى حد هتبقى مراته حتى لو وحش لازم هيتغير وهيبقى اسعد انسان "
"ربنا يخليك يا وليد يلا مع السلامه وربنا يسعدك"
"وبتنهيده كلها حزن" مع السلامه يا رشا
.....................................................................................
"على بيخبط على اوضه وليد"
"وليد بيتعدل على السرير" ادخل
"على بيدخل منكسر"وليد انت صاحى
"ايوه تعالى يا حبيبى "
"ايه يا وليد اللى خلاك تعمل كده"
"انت يا على ..ازاى اسيبك تسيب منال وانا عارف ان روحك فيها "
"وانت يا وليد وحياتك"
"انا ايه هتجوز واهى جوازه تفوت وبعدين انا مكنتش هسامح نفسى ابدا انك تتحرم من منال انا عارف ماما كويس وعارفك بردوا كنت هتيجى على جميله علشان ترضى ماما"
"بيقرب منه على وبيحضنه" ربنا يخليك يا وليد ويارب تكون جميله انسانه كويسه وتحببك فيها وتعيش انسان سعيد يارب
"ان شاء الله يا على واستعجل بقى علشان نفرح بيك انت ومنال "
"ان شاء الله وانت هتعمل ايه ازاى جواز مع جامعه"
"لاء هخطبها وارضى ماما دلوقتى والجواز لما اخلص جامعه "
"اهو وقت طويل ممكن تحبها وتغيرها "
"بضحكه مكسوره" ان شاء الله
.......................................................................................................
"سعاد بتتصل بأخوها بكر فى البلد لاول مره من يوم ما رجعت "
"بفرحه" الو اذيك يا تهانى ..انا سعاد ..الله يسلمك..اخويا بكر فين..طيب نديهولى
"الو اذيك يا سعاد يا اختى "
"اذيك انت يا بكر يا خويا عامل ايه"
"بخير الحمد لله"
"ايه يا جميله ياختى من يوم ما مشيتى لا حس ولا خبر ايه يا مش هتيجوا تخطبوا جميله "
"لاء ازاى يا خويا هنيجى ما انا بكلمك علشان كده شوف يا خويا احنا هنيجى نجيب لجميله دبله وخاتم نشبكها يعنى ولما ابنى يخلص الجامعه يبقوا يتجوزوا "
"يخلص! انتى عاوزه تشبكيها 3 سنين يا سعاد"
"وفيها ايه يا بكر يا خويا هو احنا هنخطبها ونسيبها بعدين احنا اهل انا بس هيصعب عليه اضيع مستقبل ابنى وهما الاتنين لسه صغيرين لما يخلص كليته لانها صعبه نبقى نجوزهم واهو فى اخر سنه ليه نجهز الشقه ونفرشها ماشى"
"هاتشاور كدِه مع محمود ابنى وهبقى ارد عليكِى ماشى "
"ماشى يا خويا وربنا يتمم بخير وابقى قولى نيجى امتى نجيب الخاتم "
"ماشى ياختى مع السلامه"
"بتقفل سعاد وهى حاسه بكابوس انزاح من على قلبها "
"فى الجهه المقابله بيقفل بكر التليفون"
"محمود ابنه وتهانى بفضول" ايه يابا قالتلك ايه عمتى سعاد"
"بتقول عاوزه تيجى تجيب لجميِله خاتم ودبلِه وعاوزانِى اقولهم يجوا امتى "
"تهانى بفرحه" يانهار ابيض يا نهار الهنا
"بكر" بس اقفل خشمك
"ايه يابا سيبها تفرح"
"اصل اختى بتقول يقعدوا 3 سنين لما ابنها يخلص يبقوا يتجوزوا "
"محمود" تقعد يابا هى واحدِه غريبه ولا وليد هيخلىِ بكلامه احنا اهل وكلمتنا كلنا فى العيله سيف
"يعنى انت موافق يابنى"
"تهانى" اه يلا يابا على خيرة الله
............................................................................................
"على بيلبس بدله وواقف اقدام المرايه "
"بتدخله سعاد" ايه يا حبيبى القمر دا جاهز
"وليد بأنكسار" ايوه يا ماما جاهز
"طيب يلا بينا اخواتك وعلى سبقونا على العربيه"
"حاضر"
"بتقرب سعاد من وليد وبطبطب على كتفه بحنيه" سامحنى يا وليد انا مكنتش احب اجى عليك بس غصب عنى وانا متأكده انك هتبقى سعيد مع جميله
"ان شاء الله يا ماما يلا بينا"
"انت ليه بقيت بتتكلم بلا مبالاه كده"
"عادى يا ماما بقى ماهى خلاص مبقتش تفرق يلا بينا يلا بينا هنتأخر"
.......................................................................................
"جميله واقفه اقدام المرايه ولابسه تيُير لونه اصفر والوان كتير متداخله فيه وبتحط روج احمر اوفر "
"بتدخلها الام" ايه العسل ديه
"بجد ياماما حِلوه بجد"
"اهيييه والله زى الجمر دا امه بتحبه هياخد بت عسليه وقشطه"
"الله يخليكى ياماما بس مش هما كِده اتأخروا اوى "
"اه زمانتهم على وصول يلا خلصى انتى علشان هنركب معاهم العربيه دوغرى نجيبلك الدبله والخاتم ونبقى نيجى على هينه "
"ماشى بس انى مستحيه جوى"
"يلا يا بت العربيه شكلها جيت "
"وبصوت متلجلج وبرعشه واضحه على جسمها " ايه ديه انا مكنتش بيتهيقلى انى هستحى كده يالهوووى "
.........................................................
"على ووليد وسعاد وناديه ونوالد بينزلوا من العربيه بيقابلهم بكر"
"يادى النور يادى النور اتفضلوا"
.........................يتبع
ليست هناك تعليقات:
إرسال تعليق