الحلقه الـ 13 الجزء الثانى

أنس بيقرب من إلينا بشوق : حبيبتى وحشتينى ..
إلينا بحزم وطريقه جافه : أنس لو سمحت انا مش هقدر اجى معاك النهارده ..
أنس بحزن : ليه يا إلينا .. ؟
إلينا بحده : انا مش عاوزه انا وانت نرجع تانى ..
أنس بصدمه : ليه انا عملت ايه .. ؟
إلينا متماسكه : معملتش حاجه يا أنس , امبارح كانت لحظة ضعف وخلاص راحت لحالها , أنساها ..
أنس بسخريه: ايوه انتى بتضعفى وبتقوى بسرعه جدااا , والاهم فى مغفل دايما تحت امرك ..
إلينا بحزن : لو سمحت يا أنس , احنا كنا دايما كويسين مع بعض , ياريت نفترق واحنا برضو كويسين مع بعض ..
أنس : نفترق .. ! , انتى اتغيرتى كده ازاى مجرد ليل بسيط مر .. ! , انا مش قادر اتصورك , ازاى تعملى معايا كده .. ؟
إلينا بتقرب من عربيتها وبتبعد عنه ..
أنس بيبص عليها وهى بتمشى بيقرب منها وبيمسك إيديها : انا متأكد أن حاجه كبيره غيرتك من ناحيتى ..
إلينا بحزن : انا اسفه بجد .. بس احنا فعلا مننفعش لبعض ..
أنس بصوت عالى : وانتى فجأه حسيتى دا , نمتى بس وصحيتى , عرفتى اننا مننفعش لبعض ...
إلينا بتحاول تشيل ايديها من ايده بس مسكته ليها اقوى ..
إلينا : لو سمحت يا أنس , متحاولش معايا من البدايه احنا عارفين اننا مش هننفع مع بعض ..
أنس بيسيب ايديها بهدوء : بصراحه انا اول مره اعرف انك كنتى بتفكرى كده من البدايه , اول مره اعرف اننا مش هننفع مع بعض , واضح ان مبقتش قادر افهمك ..
إلينا بألم : سلام يا أنس ..
أنس بتأثر : يا خساره حبى ليكى ..
إلينا بتركب عربيتها وبتمشى على طول ..
أنس بيبص عليها .. قلبه بيوجعه اوووى , حاسس انه تايه , فى حاجه كبيره حصلت , ألمته وكسرته ..
ازاى فى لحظه قلبه كان هيطير من مكانه , فجأه بقى بيبكى كده , ازاى الدنيا دى غداره كده ..

إلينا فى عربيتها بتسوق .. دموعها مبتوقفش ..
كده أحسن ليا وليك انا وانت خلاص مينفعش نكون مع بعض تانى ابداااا يا أنس ..

وحيد لابس و واخد غاده فى ايده ونازل ..
ناديه من على الباب : تعالى يا حبيبى افطر معانا "وبتمسك ناديه غاده بتحضنها وبتبوسها من خدها " صباح الفل يا حبيبة نناه ..
وحيد بيبوس غاده من خدها : لاء يا ماما معلش اتأخرت سلام ..
ناديه بتاخد غاده وتدخل وبتبص على وحيد وهو نازل : ربنا يوفقك يابنى , ويرجعلك ضحكتك تانى ..
فى العربيه قاعد وحيد , بيفتكر امبارح ..
ومنظر تغريد وهى مرعوبه ..
أنا غبى غبى , هتفضلى تطاردينى لامتى يا خاينه , لامتى .. !
وبيفتكر ايام مكان هو وتغريد صغيرين ..
وحيد عنده 14 سنه وتغريد وأنس 7 قاعدين كلهم فى اوضة الصالون ..
والد تغريد لناديه : معلش , عارف انه تعب على حضرتك 3 اطفال , بس انا ومامة تغريد هنسافر يومين بس ..
ناديه : بجد مينفعش اللى بتقوله دا ابدااا , دى تغريد هتنورنى واهى تلعب مع هاله ..
والدة تغريد : ميرسى ليكى بجد جدااا ..
ناديه : هو يعنى تغريد مش زى انس انا فرحت والله انكو فكرتو فيا وجبتوها هنا , بس استمتعوا ..
والد تغريد : ربنا يخليكى , نستأذن احنا ..
ناديه : اتفضلو وسلمولى على اخويا ونراته ويارب اجازه سعيده ..
وحيد بيسمع الكلام ,, سعيد بوجود تغريد جداا هو فعلا بيفرح لما بتروح تزورهم وجودها بيفرحه , والاكتر سعاده لما عرف ان عمه وزوجته وبابا ومامة انس مسافرين شغل وسياحه .. وهيفضل انس وتغريد عندهم يلعبوا سوا ..
أنس بسعاده : يلا نلعب يا تغريد ..
تغريد بأبتسامه : يلا يا أنس انا مبسوووطه اوى .. ان هقعد هنا ..
أنس بيمسكها من أيديها وبيفضلو يجرو ورا بعض ..
وحيد بأبتسامه بيبص على تغريد اللى نظراتها وأبتسامتها مفرحه قلبه جدااا ..
بيرجع وحيد للواقع مع وصوله للبنك ..
فيرونيا من اقدام الشركه بتنزل من عربيتها : هاى وحيد ..
وحيد بجديه : هاى فيرونيا , انتى عامله ايه .. !
فيرونيا : انا كويسه كتير وحيد , بس انا عاوزه اسأل انت سؤال بسيط .. لو تسمحلى .. ؟
وحيد بيدخل الشركه : طيب تعالى معايا مكتبى ..
فيرونيا : اوك ..

فى عربيته قاعد انس ..
مصدوم بيبص بيسوق العربيه بكل خيبة امل ..
أنس بصدمه بيتصل بمامته : خلاص يا ماما خلى بابا يمشى , ايوه مش جايه خلاص , متتعبيش نفسك وتعطليه .. هبقى احكيلك سلام ..
وبحزن بيحاول يستوعب صدماته كتير اوى من إلينا , ان كان حبه ليها يخليه دايما ضعيف وانها تشترى وتبيع فيه كده هو خلاص مش هيحبها , بس هو ممكن يقنع عقله بس ازاى قلبه يكرهها , ياريت قلبه يقدر ينساها علشان هو يرتاح .. كرامته مستحيل تستحمل اكتر من كده , حتى لو هيموت عليها ..
أنس بيطلع موبايله بيتصل بـ علاء ..
علاء بيشوف رقم أنس بيرد بسرعه : أنس .. بتتصل بدرى كده ليه فى حاجه .. ؟
أنس بتأثر وتنهيده طوووويله : انا وإلينا انتهينا خلاص يا علاء ..
علاء بعدم فهم : ايه اللى بتقوله دا .. هو مش كنت لسه امبارح بتقول رجعتو احسن من الاول .. ؟
أنس : انا خلاص مبقتش فاهم اى حاجه ابدااا يا علاء , ابداااا , بس الحاجه والوحيده اللى قررتها , ان فعلا أنا عمرى ما هكون مع إلينا فى يوم من الايام ..
علاء بهدوء : اهدى بس كده واحكيلى ايه اللى حصل بس .. ؟!
أنس بدموع غصب عنه بتنزل .. حكى لعلاء كل اللى حصل .. وبس يا علاء انا مبقتش فاهمها , لو يوم كانت حبتنى مكنش كل شويه فراقنا يبقى سهل عليها كده .. !
علاء بتأثر : متزعلش يا أنس هى فعلا خلاص كده خلصت , بجد مبقاش ليها مبررات اكتر من كده ..
أنس بحزن : ليه يا علاء ليه تبعد عنى وتخونى كده .. ليه .. !
علاء بحزن : معلش يا أنس , معلش ..

وحيد وفيرونيا قاعدين ..
فيرونيا لوحيد : دى تغريد اللى انت قولت لى اول ما اتعرفنا , ان بفكرك بيها وحيد صح .. ؟
وحيد بأستغراب : فعلا , بس انتى عرفتى ازاى ..
فيرونيا بأبتسامه : نظراتك ليها وحيد , كفيله بكل كلام ..
وحيد بأحراج : نظرات ايه , دا شغل اطفال , دا غير ان كلمة اعجاب وحب ملغيه تماما من قاموسى .
فيرونيا بحزن : ليه وحيد الدنيا جميله ليه مش تعيشها .. !
وحيد بعصبيه : انا مش ممكن اقبل مهما كانت الظروف اسمى يرتبط جمب اى اسم انثى مره تانيه ..
فيرونيا : شكل فى سر كبير فى حياة انت وحيد ..
وحيد بحزم : فيرونيا كلام دا مش ليه لزوم , ومش ليه داعى نتكلم فى .. دا شئ كتير خاص ..
فيرونيا بأحراج : انا اسفه وحيد مكنتش اقصد اسفه مش اقصد اتدخل ..
وحيد بحزم : خلاص فيرونيا لو خلصتى اسئله , اتفضلى شوفى شغلك ..
فيرونيا بتقف : اوك ..

فى الشركه بتدخل إلينا للمدير ..
إلينا بعنين حمرا : معلش حضرتك محتاجه النهارده اخد اجازه ..
المدير : مالك يا بنتى شكلك تعبانه .. ؟
إلينا : ايوه شويه , ممكن امشى .. !
المدير : اتفضلى يا بنتى , وهبقى اتصل بيكى اطمن انك بخير ..
إلينا بحزن : حاضر ..
إلينا بتنزل من الشركه وبتروح تقعد فى مكان هادى .. اليوم الصبح المحل فاضى مفيش فيه غيرها ..
الجرسون : اتفضلى حضرتك ..
إلينا : معلش قهوه بس ..
- تحت امرك , ثوانى ..
- اتفضل ..
بدموع بتفتكر والد أنس وهو بيكلمها .. فى وقت الفجر تقريباً ..
إلينا بقلق .. دا بابا أنس جاب رقمى منين .. وبترد بسرعه اكيد أنس حكاله ..
الاب : ايوه يا إلينا , كويس انك كويسه ..
إلينا بسعاده : ازيك يا عمو , الحمد لله انا كويسه .. حضرتك عامل ايه وطنط .. !
إلينا يا بنتى معلش من غير كلام كتير , انتى وأنس مش هينفع تكونو سوا , وياريت ميعرفش ان اخدت رقمك من عنده وكلمتك ولا يعرف بالمكالمه دى ابدااا , انتى من الاول كذبتوا علينا , وانا مقبلش مراة ابنى يكون ماضيها زى ماضيكى ..!
إلينا بحزن ودموع وصدمه : ماضيا .. ؟
الاب : انا عرفت كل حاجه يا إلينا ياريت تبعدى خالص عن أنس , ياريت تعيشى حياتك وهو هيعيش حياته بعيد عنك بس انتوا الاتنين مستحيل تنفعوا تكونوا سوا , انا مقبلش مراة ابنى تكون واحده ضعيفه , بتبيع مبادئها واخلاقها فى لحظه مهما كانت مبرراتك ومعلش علشان مجرحكيش اكتر من كده ياريت انتى تبعدى من نفسك عن أنس ..
إلينا بحزن وألم : بس انا ..
الاب : أنتهى الكلام , وياريت تكون نهايته من عندك , تمسكك بأنس وتمسكه بيكى مش هيكون غير ألم ليكى وليه ..
إلينا بحزن : مع السلامه ..
بترجع إلينا لواقعها وبتنهار دموعها فى النزول .. ليه كل دا بيحصلى ليه .. ليه عقابى مبيخلصش ليه .. يااااااارب انت عالم يارب انا عمرى ما غلط فى حياتى , غلطه واحده بس ضيعتنى كده .. ازاى ممكن اعيش من غيره .. دا عقابى اكون روحى فيه وروحه فيا ومحناش ابداااا قادرسن نكون سوا .. دا عقابى يوم ما الاقى الحب والامان .. اكون بأيدى خسرتهم وبسبب تسرعى وضعفى دا انا انتهيت .. طول عمرى .. هعيش وحيده .. من غيرك يا أنس .. من غير روحى هكون انسانه عايشه من غير روح من غير قلب من غير نبض .. ياااارب ..

بيمر ايام كتير ..
إلينا دموعها مبتوقفش مبتاكلش تقريباً . تعبانه دايما ..
أنس بدأ يتأقلم على حياه من غير إلينا .. ونهائياً ودا مش رغم عنه لاء بأرادته خلاص كرامته متستحملش أكتر من كده .. وكل ما يفتكرها عقله ينكرها ويفتكر كلامها وتخليها عنه ..
تغريد دايماً جمبه بتسانده .. بعد ما عرفت ان إلينا اتخلت عنه نهائياً , بس هى حاسه ان فى سر غامض , نظرات إلينا غير ما أنس بيحكى انها تخلت عنه للمره التانيه وسابته ..

فى بيت ناديه قاعده تغريد ..
تغريد بأبتسامه .. يلا يا غاده علشان نتفسح ..
غاده بأبتسامه : بجد .. !
تغريد بهزار : وانا من امتى كذبت يعنى , دا انا هفسحك فسحه جميله ..
ناديه بخوف : طيب كلمى وحيد قوليله الاول يا تغريد , بعدين يضايق منى .. !
تغريد بأبتسامه : ماشى يا طنط , هكلمه اسأله ..
بتتصل تغريد بوحيد اللى اول ما شاف رقمها رد بسرعه وساب كل الورق اللى فى ايده : الو ..
تغريد : من غير الو ولا ازيك ولا الكلام دا , الوقت بيمر وبقينا الضهر وكل دا محسوب على وقت الفسحه .. انا وغاده هننزل نقضى يوم بره نروح الملاهى وناكل بيتزا ونرجع .. ماشى طيب خلاص ماشى يلا نبقى نشوفك بليل ..
وحيد بضحك : مجنونه , بلاش يا تغريد انا بخاف عليها ..
تغريد بأبتسامه : لاء متخافش معاها راجل .. احم احم , اقصد معاها انا يعنى ,, ويلا بقى انت كده اخدت وقت كتير ..
وحيد بأبتسامه : طيب هتنزلو امتى ..
تغريد بسعاده انه وافق : حالاا طبعااا يلا بقى سلام ...
وحيد بسعاده : طيب قوليلى هتروحو اى ملاهى ..!
تغريد بأبتسامه : هنروح دريم بارك .. يلا بقى سلام ..
وحيد بأبتسامه : اوك , بس خلى بالك منها ..
تغريد بأبتسامه : تمام يا فندم , وبتقفل معاه وهى بتحضن غاده , بابى وافق ..
ناديه : ياااارب يفرحك يا تغريد , لولا انتى وانه بيعزك عمره ما كان وافق ابدااا , دا مبيخرجهاش من البيت ..
تغريد بأبتسامه : هو انا اى حد ولا ايه .. !

فى الشركه إلينا واقفه اقدام المدير وهى بتبص فى الارض ..
المدير بحده : ازاى كل الحسابات تبقى غلط كده .. !
إلينا بتعب : اسفه ..
المدير : واسفك دا هيفيدنى بأيه , انتى عارفه انتى خسرتى الشركه اد ايه .. ؟ ازاى انتى تعملى كده دا انتى من أكفأ الموظفين عندنا ..
إلينا بدوخه : معلش انا مش عارفه ازاى , لو سمحت ممكن امشى ..
المدير : هو للاسف يا مدان إلينا لو استمر اهمالك دا فى الشغل , حضرتك هتمشى على طول ..
إلينا بدموع والدنيا بتلف حواليها : انااااا وبتوقع فى الارض ..

تغريد واقفه بتشترى أيس كريم ليها ولـ غاده ..
بعد ما خلصت بتتدور علشان تدى لـ غاده بتتلفت حواليها , غاده , وبروحها بتروح واعصاب بتنهار , غاده يا غاده , وقعت الايس كريم فى الارض وطلعت تجرى وهى بتدور حواليها زى المجنونه .. نفس اللحظه اللى شافت فيها وحيد بيقرب منها وبيبصلها ..

******************يتبع