شرف أرملة الحلقه العاشره

بتفتح هناء الباب : دا دكتور ناصر يا هانم .. اتفضل يا دكتور .. ؟
ناصر وهو بيدخل : ازيك يا هناء ..
هناء بهدوء : نحمده يا دكتور بخير .
- الحمد لله , فين داليا .. ؟
- جوه قاعده يا دكتور اتفضل ف الانتريه ..
- طيب , اعمليلى قهوه مظبوط معلش ..
- حاضر ..
بيدخل ناصر وبيقعد وهو بيتنفس ..
داليا وهى مش قادره بتقعد ورجليها بتحركهم بصعوبه : ازيك يا ناصر , كده يا ناصر مبتسألش عليا غير لما انا اللى اقولك وحشتنى .. ؟
ناصر بتعب : والله يا داليا انا تعبان وزهقان اوى من حياتى .
- لمياء برضو .. ؟
- اه بجد مبقتش قادر لا على الغطرسه ولا الطمع ولا انها تعيش لنفسها بس , بجد حرام حرام .
- بس انت عارف انها مكنتش كده يا ناصر , حتت انها مبتخلفش دى اللى خليتها كده , متزعلش منها بس هى حقها , اى واحده مكانها لازم تبقى كده
- بس احنا بقالنا سوا 16 سنه يا داليا لا يوم فكرت اتجوز ولا قولت عاوز ولاد , وبعدين دا مالوش دعوه بالاسلوب , الاحساس بالغير والحب والحنيه دى صفات فى الشخص ..
- بس هى مكنتش كده يا ناصر , انت عارف ان مش بدافع عنها وانت اكتر واحد عارف ان انا وهى مش لينا مع بعض توافق بس انا خايفه عليك انت , انا ياما قولتلك اتجوز وافرح بأبنك انت اللى رفضت وقولت لاء مزعلهاش .. بس شوف دلوقتى ايه حصل .. ؟
- داليا بالله عليكى متبدأيش قوليلى كنتى عاوزانى ليه ..؟
- كنت عاوزه اشوفك وعارفه انك مش هتيجى الا كده , انا بزعل منك بجد ..
ناصر بطيبه : معلش يا حبيبتى والله مببقاش عاوز اضايقك بمزاجى المتغير دايما ..
داليا وهى مقموصه : اه ما علشان انا مش اختك الشقيقه لو كنت شقيقتك مكنتش قولت كده ولا عملت الحساسيات دى .. ولا تدخلى الشقه زى الغُربا ..
- لا لا اوعى تقولى كده تانى , انا والله مقصدش كده انتى عارفه انا بحبك ازاى , هو انا ليا غيرك ..
- ربنا يخليك ليا ( وبقلق اتكلمت بصوت بيرتعش وعين زايغه ) بقولك يا ناصر , انا عاوزه اجوز ساهر .. ؟
- بس ساهر مينفعش يتجوز يا داليا , حرام عليكى هتظلمى اللى هتتجوزه معاه .. !
- يعنى ايه اظلمها هو اى واحد كفيف مينفعش يتجوز يعنى .. ؟
- لاء بس مين المشكله مين تقبل , ولازم تعرف انها هتكون ليه مامته مش زوجته , لازم تعرف انها مجرد مربيه مش زوجه , لازم تعرف انها ممكن تقابل اى ظرف واولهم انه ممكن ميخلفش .. !
- اه بس لاء ان شاء الله هيبقى تمام ويخلف , وبعدين ابنى متعلم وزى الفل واى بنت تتمناه وعمر النظر ما كان مشكله كتير نظرهم راح وربنا خلاهم يخلفو ويبقو كويسين جداااا .
- طيب والموضوع التانى .. ؟
داليا بتوتر : ها لاء مهو بقى كويس متقلقش
- طيب ومين بقى اللى وافقت عليه وياترى شافته واتكلمو .. ؟
- هى البنت موجوده وتتمنى اصلا , بس لسه هو مقعدش معاها , بس انا وعدته هجوزه قريب ..
- ماشى يا داليا , اعملى اللى يريحك بس متظلميش وقبل اى شئ تعرفى البنت واهلها كل حاجه تخص ساهر ..
- ربنا يسهل .
ناصر بيقوم يقف : طيب يادوب امشى انا , بس فين محمد وساهر صحيح .. ؟
- محمد لسه مرجعش وساهر نايم ..
- طيب ابقى سلميلى عليهم بقى ..
- ان شاء الله ..

*****************************************************

بهاء بأستغراب لطريقة باباه بيتكلم بقلق : انا مش قادر افهم ,ايه غيرك كده يا بابا .
منصور : غيرنى ايه اوعى تكون كنت بتقصد بنت انعام يا بهاء ..
- ايوه يا بابا اقصد الهام طبعاً , بس انا مش قادر افهم حضرتك .
- لاء بقى انا اقصد شيماء بنت وليد جارى وصاحبى وحبيب عمرى .
- ازاى شيماء , شيماء لاء طبعاً انا اقصد إلهام ..
- إلهام لو اخر بنت ف الدنيا على جثتى يا بهاء , وهتتجوز شيماء ورجلك فوق رقبتك .
- لـــــــــــــيه ليه رافض إلهام بالطريقه دى ليه ..؟
- علشان سمعتهم يعنى اسيب الراجل المحترم وبنته ست البنات واخد واحده امها ..........
- انت بتقول ايه يا بابا طنط انعام انسانه مكافحه ومحترمه .
- لاء انت بقى متعرفش حاجه وبلاش تخلينى اجيب ف سيرة الولايا , انا قولت كلمه البنت دى تنساها تماماً .
- بس يا بابا انا بحبها .
- هتحب غيرها والكلام ف الموضوع دا انتهى ..
- بس ........
- مبسش قولنا انتهينا , واعمل حسابك يوم الخميس الجاى هتبقى قراية فاتحتك على شيماء , والجواز هيتم بسرعه .
- بس انا مبحبهاش .
- انا محبتش امك وعايش معاها مبسوط , كفايه انها بنت اصول .
- يا بابا طنط انعام ست كويسه وبنتها طول عمرى عارفها وعارف اخلاقها .
- يا سلام طول عمرك , ايه غلط معاها ولا ايه واكلت مخك ولازم تتجوزها ..؟
- حاشا لله دى بنت بميت راجل , ودا اكتر شئ مخلينى متمسك بيها غير ان بجد مش قادر اشوف غيرها .
- لاء هتشوف والهام دى تنساها تماماً .
- لاء لازم اعرف ليه الاول ..
- هقولك ليه , بس اعرف ان الكلام دا عمره ما كنت هقوله لولا لمسك , بس انت تصرف نظر بعدها عن البنت دى تماماً .
- افهم الاول ..

*****************************************************

فى بيت انعام قاعده ومعاها إلهام بتذاكر وأميمه نايمه ف حضنها ..
إلهام بتعب بتبص على انعام واميمه نايمه فى حضنها وبأبتسامه : حبيبتى نامت ..
أنعام بتبطب على اميمه : اه , هقوم انيمها ف السرير اهو ..
بتدخل انعام تنيم اميمه وبتخرج لإلهام سمعت صوت الجرس الخارجى للبيت ..
إلهام : يا ترى مين دلوقتى دا احنا متأخر اوى ..
انعام بأستغراب : يارب خير ..
بتقف انعام اقدام الباب الداخلى وبصوت مسموع للى بره : مــــــــــين ..؟
هناء بصوت هادى : انا هناء يا انعام افتحى .. !
أنعام بخوف بتبص لإلهام : دى هناء , يلا ادخلى انتى بقى ارتاحى ف اوضتم وانا هفتحلها .
إلهام بهدوء : طيب يا ماما ..
بتخرج أنعام بتفتح لهناء ..
هناء بتدخل براحه : عاوزاكى ضرورى ..
أنعام بقلق : خير ..
هناء وهى بتعمل صوت وهى بتاكل البانه : هقولك بس حد هنا ..
- البنات نايمين , قلقتينى فى ايه .. ؟
- هقولك بس تعالى نقعد رجليا وجعتنى .
- طيب ياختى ادخلى الاوضه بتاعتى اميمه نايمه ..
بتدخل أنعام ووراها هناء وبيقعدوا وهما بيواربو الباب ..
هناء بتقعد وبتتكلم : الست بتقولك هتردى امتى ..؟
انعام : يعنى اجيبلها بس الفلوس منين دلوقتى , ايه خلاها اتقلبت مره واحده كده , مش كانت بتقولى مش هاخدهم غير لما بناتك يكبرو ..
- بتقولك ظروفها وحشه يا انعام وكتر خيرها ..
- بس انا اجيب منين يعنى المبلغ دا كله ..
- متنسيش يا انعام ياختى محدش بيعمل زيها كده فى الزمن دا, دى كانت بتديكى فلوس على فلوس ومش بتقول على الحساب ..
- وهو انا قولت حاجه , بس انا مينفعش اتصرف فى البيت لانه ميراث البنات وهما المتصرفين فيه بعد ما يبلغو سن الرشد وحقى ميطلعش حاجه فيه ,, والفلوس بتاعتى خلصتها وفلوسهم مقدرش المسهم انتى عارفه دا الحكومه عرفاه ولازم لما يكبرو ويقدرو يتصرفو فيهم , دا غير عمهم هو الوصى عليهم وماليش حد انتى عارفه ان مقطوعه من شجره محدش ليا يسأل ولا يقولى عملتى ايه ولا بتعملى ايه , اعمل ايه بس يارب ..
- عارفه ياختى عارفه ما هو الغلبان مبيشبعش غلب بس هو يعنى فلوس بناتك والبيت يكفوا اللى عليكى ..؟
- لاء ومعاش عبدالله مقدرتش اوفر منه مليم , وانا منفعتش فى ولا شغل بسبب بنتى اميمه مكنتش ينفع اسيبها ما انتى عارفه ,اعمل ايه بس يارب ..
- انا حاسه انها بترسم على حاجه يا انعام بس مش عاوزه اقولك .
- ايه قوليلى وعرفينى ربنا يكرمك ..
- بصى ويارب يخلف ظنونى يارب , بس كل شويه تسألنى على الهام هى حلوه ف سنه كام , وبتعمل ايه وطيبه ولا تعباكى وكده ..
- إلهام ليه .. ؟
- ما انا بقى شاكه انها عاوزه تاخدها لابنها ساهر الضرير , وتلوى دارعك ..
- انتى بتقولى ايه , دا انا اتسجن فيها ولان بنتى تتجوز جوازه زى دى , بنتى مستحيل طبعاااا .
- يارب اكون غلط انا بقولك اللى شاكه فيه ..
- يارب يكون غلط , وانا هاجى معاكى بكره بس لما اشوف اللى بفكر فيه هينفع ولا ايه .
- هو ايه اللى بتفكرى فيه ..
- هتعرفى بكره لما ابقى اعمله ..
- طيب يا انعام همشى انا بقى , يلا مش عاوزه حاجه .
- لاء عاوزه سلامتك وكتر خيرك والله .
بتمشى هناء وبتقعد انعام وهى بتمسك تليفون البيت ..
- الو ...................

*****************************************************

فى بيت منصور بيدخل ومعاه بهاء ..
بهاء بخيبة امل بيدخل مباشره على اوضته ..
مروه وهى خارجه بتخبط فيه : حبيبى معلش ..
بهاء بعين مليانه قهر بيبصلها وبيتوجه لاوضته ..
مروه وهى بتبص عليه لحد ما دخل وقفل اوضته على نفسه بتخرج لمنصور اللى قاعد على كرسى الانتريه جمب الباب : مالكو يا منصور طالعين عاملين كده ليه ..؟
منصور بضيق بيبصلها وبيفضل ساكت ...
مروه بعصبيه : ف ايه يا منصور , مالك .. ؟
منصور بضيق : انا هروح انام النهارده ف البيت التانى , وانتى ادخلى لابنك عقليه .
مروه بضيق : هو الموضوع بخصوص البيت التانى ولا ايه قولى ... !
- لاء يا مروه الموضوع بخصوص انعام وبنتها , ابنك عاوز يعصينى ويتجوز بنت انعام ..
- طيب ومالها بنت انعام يا منور عيبها ايه , ما هى بنفس اخلاق شيماء , ومؤدبه زيها ..
- بقولك ايه انتى عارفه كل حاجه عارفها عن انعام , انا حكيتلك مخبتش عليكى , قولى لابنك ينسى وبلاش يحاول حتى يفكر فيها , وانتى مش عاوز كلام كتير والا انت عرفانى ماليش عزيز والله .
- خلاص خلاص , بس مقولتيليش دلوقتى اعمل ايه يعنى ..؟
- تقوليله ينسى وانا وهو يوم الخميس اللى بعد بكره هنقرأ فاتحة شيماء بنت وليد غير كده مش عاوز نص كلمه , انا قولتلك اهو اللى فيها ..
- ماشى يا منصور , اللى تشوفه , بس متضايقش نفسك صحتك .
- خلاص يا مروه يلا انا ماشى , وعقليه اصل شكله مش مقتنع بكلامى , ومش مصدق اللى حكتهوله على سعيد وانعام .
- بصراحه وانا زيه
- ايـــــــــه يعنى انا بكدب .
- لاء يا خويا سعيد اللى ابن **** .
- خلاص يا مروه حتى لو الكلام غلط وهو بيفترى عليها , نبعد عن الشبهات , ايه يخلى ابنى يحط نفسه ف عيله زى دى , بريئه مش بريئه شئ يرجعلهم , بس ابنى مياخدش حاجه زى كده
- خلاص يا منصور هتكلم معاه ..

منصور وهو بيفتح الباب : ربنا يهديه .. يلا سلام ..

*****************************************************

بيطلع ناصر بيته وهو متضايق ..
لمياء وهى لابسه لبس نوم ورافعه شعرها وحاطه ميكب بتقرب منه بأبتسامه : حبيبى جيت وحشتنى اوى ..
ناصر بأستغراب للبسها ورقتها : لمياء .. !
لمياء بحب : حبيبى تعالى معايا ( وبتاخد ايده وبتمشى تقربه من السفره عليها تورته وبيتزا ) شوف عملالك ايه ..
ناصر بفرحها بيقرب منها : الله احلى مفاجئه بجد ..
لمياء : انا بحبك اوى يا ناصر , بلاش تزعل من عصبيتى , بس انا فعلا مقدرش استغنى عنك ابدااا والله .
ناصر بحنيه : ولا انا اقدر بس ترجعى مراتى حبيبتى اللى رقة الدنيا والحنيه فيها ..
- حاضر يا حبيبى , ممكن تقعد بقى .. ؟

ناصر بحب : حاضر ..
بتقرب لمياء بحب وبتقعد جمبه وبتأكله قطعة بيتزا ..
ناصر بفرحه بياكل وبعدين بياخدها منها وبيأكلها ..
لمياء بسعاده : انا بفرح اوى لما بشوفك سعيد يا ناصر ..
- وانا بموت فيكى بس تفضلى كده بس يارب ..

***************************************************

بهاء نايم وحاطط المخده على دماغه ..
بتدخل مروه وبتلاقى الاوضه ضلمه جداا بتفتح النور وبتشوف بهاء نايم ..
بتقرب منه بحزن : بهاء .. ؟
بهاء مبيردش ..
- يا حبيبى رد عليا , قولى بتفكر فى ايه بس ..
بصوت حزين ومكسور بيشيل المخده وبيقوم يقعد : بفكر ف حب طفولتى حب كبرت ووعيت عليه حب كنت فاكر من ساعات بس انه خلاص اتحقق , ضاع لمجرد ادعاءات , انا متأكد انها ادعاءات من الحيوان اللى اسمه سعيد , لاننا عارفين سعيد وعارفين طنط انعام , وواثق انها متعملش كده .
مروه بطيبه : عارفه يا حبيبى , ومتأكده زيك , بس خلاص يا بهاء مينفعش , بابا هيزعل منك ونازل وهو متضايق اوى .
- قوليله ميضايقش يا ماما , اللى هو عاوزه انا هعمله , عمرى ما هغضبه , بس صعبان عليا هكسر قلبها , وان اتسرعت وعرفتها وف لحظه هخذلها واخلف كلامى معاها , واهز ثقتها ف نفسها لما تلاقينى فجأه بعدت عنها ..
- معلش يا حبيبى , هبقى اكلم انا انعام واقولها ان كان فى سوء تفاهم ..
- لاء يا ماما متكلميش , خليها تعرف ان عيل ومش اد كلمتى وبلاش تعرف ان مامتها بيتشكك فى سمعتها .
- ماشى يا حبيبى حاضر .
- انا بحبها اوى يا ماما .

مروه بتحضنه : يا حبيبى .
بهاء بيسيب دموعه تنزل : انا حاسس ان كنت طاير فوق ووقعت واقعه ضيعت عمرى وشبابى وفرحتى , قلبى مخنوق اووووووى .
مروه بدموع لدموعه : مش عارفه اعمل ايه , والله ما عارفه .
بهاء بيطمنها وهو بيبعد عن حضنها : انا هبقى كويس , بس عاوز انام .
مروه وهى بتغطيه : ماشى يا حبيبى نام ربنا يحلها يااارب ويفرح قلبك .

*****************************************************

تانى يوم بتلبس انعام وبتاخد اميمه ف ايديها .. يلا يا حبيبتى علشان اوديكى المدرسه ..
اميمه بكسل : طيب
إلهام وهى ف اوضتها بتدخلها انعام بتشوفها نايمه ..
أنعام بتبطب عليها : إلهام , انا خارجه مع اختك وجايه ..
إلهام : مممم ماشى يا ماما ..
بتخرج اميمه وبتفتح إلهام عينيها حمرا جداااا وواضح انها منمتش طول الليل ..

***************************************************

أنعام بتوصل أميمه لمدرستها , وبتروح على بيت وبتقف اقدامه ..

************************* يتبع