انا ظابط ايوه بس حنين اوى والله وكل مشكلتى فى الحياه الست بتاعتى .. ايوه مطلعه عينى , ومجننانى , مخليانى بلف حوالين نفسى , هتجننى .. ! مش عارف ارضيها ازاى كل حاجه ..
اه مش انت ظابط تبقى عينك زايغه , اه والله وانا مسكين " بتمر من اقدامه بنوته زى القمر" يا نهااااااار اسوح يا جدعان على الستات ..
احم احم ,, لاء متصدقوش دا موقف عابر كده بس والله انا مبحبش غيرها هى وبس "سلمى" دى سلمى دى جمال ايه ورقة ايه وحلاوة ايه انتوا مش متخيلين انا بحبها ازاى دى موهجتى ونور حياتى ..
"بيقف اقدام باب شقه وبيفتح "
اهو انا داخل الشقه اهو شوفوا بقى المقابله هتبقى عامله ازاى .. !
"صوت من جوه الشقه"
ميــــــــن انت جيت يا تامر..
"تامر برجفه"
اه اه يا حبيبتى جيت انتى جوه .. ؟!
"بتقرب سلمى وهى فى ايديها اداه من ادوات المطبخ وبنظره شاكه"
انت جيت يا روحى .. ؟
"تامر بخوف ولجلجه"
ايه بس يا حبيبتى بتشمى فيا كده ليه هو انا معايا مخدرات..
"بترفع الاداه فى وشه"
انت تقصد ان كلبه يا تامر ..
"تامر بحزن"
يا حبيبتى بهزر , حد يقدر يقول كده بس , دا انتى نعمه .. !
"بتبعد عنه وفى ايديها الاداه وبنظره خبيثه"
ممممممم طيب ادخل غير هدومك يلا على ما اعمل الاكل يلا .. ؟
"بيجرى على اوضته"
حاضر حاضر
******************
"تانى يوم "تامر" قاعد فى الشغل واقدامه متهم وبيضرب فيه"
تامر : بردوا مش هتعترف
المتهم وهو بيتألم من الضرب:
يا بيه والله انا مظلوم , حرام عليك , انا عملت ايه علشان كل الضرب دا .. ؟
"تامر بعصبيه وهو مش عارف يقول ايه"
علشان علشان , ممم اه علشان انت بتخلى صوت مراتك يعلى عليك ليه ها ليه .. !
المتهم بأستغراب ونفور"
نعم يا بيه , انت بتقول ايه .. ؟
كل الضرب دا مش علشان انا ضربتها وفرجت عليها الشارع ... علشان هى بتعلى صوتها عليا .. !
"تامر بتوتر وهو بيبعد عنه وبيطلع سيجاره وبيدخنها بعصبيه بياخد نفس طووويل وبنفخ فى الهوا"
اه ما الراجل اللى يسمح لمراته تعلى صوتها عليه يبقى مش راجل
يا بيه يعنى انت خدت بالك انها بتعلى صوتها ومخدتش بالك من الضرب اللى ضربتهولها .. !
يلا يلااااا امشى من اقدامى خده يا شاويش على الحجز لحد ما نشوف مراتك وتبقوا تتصالحوا وخلاص وترجع تانى تاخد بالجزمه واقدام الناس بس تعملى راجل .. بلا قرف رجاله تعر اه ما انت ما شوفتش رجاله دا انا , وتليفونه بيرن ... يا نهار لتكون .. سلمى ...
"بوش احمر مرعوب"
ايوه يا حبيبتى .. ايه فى حاجه انتى كويسه .. جايه جايه فين لاء طبعااا مينفعش .. دا سجن ,, وبرعب ... خلاص يا حبيبتى ينفع دا انتى هتنورى .. طبعاً
بيقعد تامر وهو مرعوب
يا ترى جايه ليه , اه اكيد شاكه ان مش فى الشغل , لاء انا لازم ابقى حازم عن كده انا كده مش نافع الله يمسيكى بالخير يا ماما قولتيلى ادبح القطه واهى ادبحتلى انا
"فلاش باك"
"تامر شايل سلمى وهى عروسه زى القمر وبيدخل بيها بعد انتهاء الفرح وغيرة كل اصحابه منه علشان مراته اللى زى القمر "
بيدخل من الباب وبمنتهى الرومانسيه , بيقرب من السرير وبيقعدها وهو بيخطف قبله ...
سلمى بحب : بتحبنى بجد يا تامر
تامر وعينه بتضحك : انا بموت فيكى , انا مش متخيل اننا اتجوزنا بجد
سلمى ببرائه :
طيب اخرج بقى على ما اغير هدومى
تامر بيفتكر كلام مامته متخليهاش تتأمر عليك ولا تقولك اعمل ومتعملش انت كلامك اللى يمشى بصوت حمش :
اخرج فين انتى متقوليش اخرج قومى انتى اخرجى
سلمى بعصبيه: نــــــــعـــــــــــــم .. !
تامر: انتى بتعلى صوتك عليا .. ؟
سلمى بزعل وبرقه مصطنعه : تامر اخرج بره ومتكلمنيش تانى والنهارده تعمل حسابك تنام لوحدك بره ..
تامر بحزن وعينه على جمالها ورقتها اللى دوبت كل عصبيته وقرب منها بحب
تامر : انا بحبك يا سلمى متزعليش منى
سلمى بفرحه : انا عمرى مازعل منك بس متعاملنيش كده تانى علشان انا بحبك
تامر بحب : وانا بموووت فيكى يلا بقى
بكسوف : يلا ايه .. ؟
تعالى هقولك كلمه فى ودنك
بحب بتقرب منه سلمى : ايه ..! عايز ايه فى ايه
الله مالك يا سلمى مش احنا كنا بنحلم بيوم دخلتنا دا
سلمى بكسوف : عايز ايه يعنى يا تامر
تامر بيقفل النور وبيقرب منها بحب : اقولك ان بحبك بس
"بيفوق تامر من شروده وبيرجع للواقع على صوت الشاويش بيعرفه ان سلمى بره"
تامر بقلق : اتفضلى يا حبيبتى
سلمى بتقرب بحب وفى ايديها شنطه صغيره ..
تامر بأستغراب لهدوئها وطيبتها : حبيبتى ايه انتى كويسه .. ؟
سلمى برقه : اه يا حبيبى وجيبالك اكل
تامر بأستغراب : ربنا يخليكى ليا يا سلمى ويخليلى رقتك دى دايماً
سلمى بحب : حبيبى انت عارف ان بحبك بس بغير عليك اوعى تكون بتزعل منى .. ؟
اناعمرى ما ازعل منك ابدا انا بحب غيرتك دى اوى بس لما بتبقى بهدوء حد يزعل ان مراته بتحبه وبتغير عليه .. !
يا حبيبى وحياتى انتَ ,, وبتقرب منه علشان تبوسه من خده الشاويش خبط على الباب ..
تامر بعصبيه : ايــــــــــــــه ؟ دا وقته
"معلش يا بيه بس منه الصحفيه بره وعايزه تدخل لساعدتك "
سلمى بتبصله
تامر بخوف ولجلجه : قولها مفيش قضايا خليها تيجى بكره
سلمى بنظره لـ تامر حاده
تامر بخوف : ايه بتبصيلى كده ليه والله ددد دى دى صحفيه وبتيجى تاخد قضايا مخدرات وكده
سلمى : طيب خليها تدخل
تامر بخوف : طيب تدخل فيها ايه يعنى لما تدخل ايه المشكله لما تدخل .
سلمى بحده : تــــــــــــامر قوله يدخلها
"الشاويش واقف يبص لتامر اللى واقف مرعوب ومستغرب بس فرحان فيه وهو بيردد , يا عينى على الرجاله وطول النهار يشخط فينا احنا يا خساره يا استاذ تامر طلعت انت كمان راجل نص كم "
تامر بخوف : داخلها يا بنى
الشاويش : تمام يا فندم
***********************
"بتدخل منه بنوته زى القمر رقه وشكل وانوثه "
"سلمى وهى بتبص عليها بأعجاب"
يالهووووى على البنات .. !
تامر بيسمعها ...
سلمى انتى كويسه .. ؟
سلمى بتبصله وبترجع تبصلها .. ايه دى .. !
تامر بيلحق الموقف : اهلا انسه منه المدام بتاعتى سلمى
منه بأبتسامه خلابه : اه هاى
سلمى : الله وصوتها كمان حلو , تامر انقلك فين تانى , اداب ونقلت احوال مدنيه ونقلت اوديك فين تانى
تامر بأحراج : سلمى ثوانى يا سلمى اتفضلى يا انسه منه قولى عايزه ايه .. ؟!
منه وهى مستغربه سلمى :
حضرتك كنت قولتلى انك هتقولى شويه معلومات عن تاجر المخدارت عطوه .. ؟
تامر : ايوه بس انا بعد يوم الخميس هبقى اقولك والخبر هيكون عندك حصرى ان شاء الله
سلمى بضيق : اشمعنى عندها حصرى .. !
تامر : دا شغل يا سلمى ثوانى ..
منه بأحراج : طيب انا اسفه يا استاذ تامر عطلتك بعد اذنك وهستنى من حضرتك خبر .. وعينيها على سلمى !
سلمى بتبص عليها من فوق لتحت : متقلقيش يا حبيبتى لو هو مكلمكيش هكلمك انا ..
..........................
ليست هناك تعليقات:
إرسال تعليق